Эх сурвалж : Bloomberg TV Нийтлэгдсэн : 2017.02.01

Нийслэлийн хэрэглэгчдийн 30 гаруй хувийг талх, нарийн боовоор хангадаг "Атар-Өргөө" ХК өнгөрсөн онд 12.3 тэрбум төгрөгийн нарийн боовны бүтээгдэхүүн зах зээлд борлуулжээ. Энэ нь 2015 оныхоос 690 сая төгрөгөөр буурсан үзүүлэлт болж байна. Компани үйлдвэрлэж байгаа бүтээгдэхүүнд өртгийн хэмжээг 70 орчим хувьд барьдаг. Энэ нь 2016 оны үзүүлэлтээр 8.6 тэрбум төгрөг хүрсэн байна. Зардлын хувьд, борлуулалт маркетингийн зардал хамгийн өндөр байдаг. Энэ удаад зардлаа бага зэрэг танасан буюу 2.2 тэрбумаас 1.8 тэрбум төгрөг болгон бууруулжээ. Ингэснээр "Атар-Өргөө" 2016 онд 664.7 сая төгрөгийн цэвэр ашигтай ажилласан байна. Тайлант хугацаанд улсад 105.4 сая төгрөгийн татварын орлого төвлөрүүлсэн байгаа юм. Дашрамд дурьдахад, компани гадаад валютын ханшийн зөрүүнээс 2016 онд 16.8 сая төгрөгийн ашиг олжээ. Харин 2015 онд ханшийн өөрчлөлтөөс 3.5 тэрбум төгрөгийн алдагдал хүлээж байсан юм. Өнөөдрийн байдлаар 10 тэрбум 970.5 сая төгрөгийн зах зээлийн үнэлгээнд хүрээд байгаа "Атар-Өргөө" хүнсний үйлдвэрийг 1997 онд нээлттэй дуудлага худалдаагаар “Бэрэн” ХХК худалдан авснаар бүрэн хувьчлагдсан. Одоо "Бэрэн групп"-ийн харьяанд үйл ажиллагаа явуулж байна.