Эх сурвалж : Bloomberg TV Нийтлэгдсэн : 2017.01.09

Монгол Улс эхний улиралд төлөх 580 сая aм.долларын өрийг саадгүй, эдийн засагтаа дарамт болохгүйгээр төлөх гарц шийдлээ олсон, хугацаандаа төлнө гэж Ерөнхий сайд Ж.Эрдэнэбат мэдэгдлээ. Мөн "Таван Толгой"н ордын тухайд Монгол Улс, Монголчууддаа ашигтай байх боломжит хувилбар бүхий төслийг удахгүй УИХ-д өргөн барьж, нээлттэй хэлэлцүүлнэ гэж өнөөдөр Аймаг, нийслэлийн ИТХ-ын дарга, засаг дарга нарын семинарын үеэр Засгийн газрын тэргүүн хэлсэн үгэндээ онцолсон юм.

Орон нутагт барих зам, барилга зэрэг дэд бүтэц, бусад төслийн сонгон шалгаруулалт, бэлтгэл ажлыг эртнээс хийж дөрөвдүгээр сарын 1-нээс ажлыг эхлүүлэх ёстой гэдгийг Ерөнхий сайд аймгийн удирдлагуудад анхааруулсан байна. Үүнээс гадна гэрээ нь хийгдсэн ч ажил нь эхлээгүй удсан төслүүдийг хүчингүй болгохоос гадна цаашид төсөл хэрэгжүүлэгчийг сонгон шалгаруулахдаа урьдчилгаа төлөхийг шаардана гэж мэдэгдсэн юм.