Эх сурвалж : Bloomberg TV Нийтлэгдсэн : 2016.12.06

Монгол Улсын Ерөнхий сайд Ж.Эрдэнэбатын захирамжаар Эдийн засгийн бодлогын зөвлөлийн бүрэлдэхүүнийг шинэчлэн баталлаа. Зөвлөлийн үндсэн чиг үүрэг Монгол улсын дунд, урт хугацааны хөгжлийн бодлого, төр хувийн хэвшлийн хамтын ажиллагаа, банк санхүүгийн салбарын асуудлаар Засгийн газарт бодлогын зөвлөгөө өгөх, дэмжлэг үзүүлэхэд чиглэх юм байна. Орон тооны бус зөвлөлийг Монгол Улсын Ерөнхий сайд ахлан ажиллана. Харин гишүүдэд Үндэсний статистикийн хороо, Монголбанк, Банкны холбоо, МҮХАҮТ, Ажил олгогч эздийн нэгдсэн холбоо, Хувийн хэвшлийг дэмжих үндэсний зөвлөл, Эдийн засгийн судалгаа, эрдэм шинжилгээний хүрээлэн, МУИС зэрэг байгууллагын төлөөлөл багтсан байна. Энэ дундаа эдийн засаг, банк, санхүүгийн тогтолцоонд тулгарч байгаа хүндрэлийг даван туулах, цаашид тогтвортой өсөлтийг хангах, макро эдийн засгийг тогтворжуулах арга зам, бодлогын хувилбаруудыг боловсруулж Засгийн газарт танилцуулах аж.