Эх сурвалж : www.gogo.mn Нийтлэгдсэн : 2016.11.29

“Валютын ханшийн огцом хэлбэлзэл, түүнийг тогтворжуулах арга замууд” сэдэвт, олон талт хэлэлцүүлэг өнөөдөр болно. 12:00 цагаас Хэвлэлийн хүрээлэнгийн хурлын танхимд болох энэ хэлэлцүүлэгт Монгол банк, Монголын хөрөнгийн зах зээлийн зөвлөл, МҮХАҮТ болон бизнес эрхлэгчдийн төлөөлөл оролцох юм.

Өнгөрсөн хугацаанд МҮХАҮТ ханшийн огцом өсөлтийг сааруулах бодит гарц санал болгосоор ирсэн. Тэд төгрөгийн ханшийн огцом уналтаас шалтгаалан бизнес эрхлэгчид, ялангуяа валютын зээлтэй аж ахуйн нэгжүүдийн зардал огцом өсч, валютын ханшны эрсдэлийг удирдах боломжгүй болсноос сөхрөхөд хүрч байгааг анхааруулдаг.

Энэ байдал цааш улам даамжирвал Монгол улс дампуурлын ирмэгт тулна гээд Иргэний хуулийн дараах заалтыг нэг зарчмаар ойлгож хэрэглэхийг эрх баригчид, арилжааны банкуудад уриалсаар ирлээ.

Иргэний хуулийн 218 дугаар зүйлийн 1 дэх заалтанд Төлбөр гүйцэтгэх мөнгөний ханшийн талаар ингэж заажээ. “Төлбөр гүйцэтгэх хугацаа болохоос өмнө мөнгөний ханш өссөн, буурсан бол үүрэг үүсэх үеийн ханшаар тооцож төлбөрийг төлнө”. Мөн олон улсад хүлээн зөвшөөрдөг, “хүнд нөхцөл байдал” (hardship) буюу эдийн засгийн урьдчилан таамаглах боломжгүй өөрчлөлтийн улмаас гэрээний үүргээ зохих ёсоор биелүүлэх боломжгүй байдал гэсэн нэгдсэн ойлголт байдаг аж.

“Хүнд нөхцөл байдал”-ын улмаас гэрээний үүргээ биелүүлэх хариуцлагаас чөлөөлөгдөх боломж байгааг зохих ёсоор хэрэгжүүлэхийг ч уриалдаг юм. Гэвч өнөөг хүртэл энэ нь хэрэгжих боломжтой эсэхэд Монголбанк болон арилжааны банкны удирдлагууд хариу өнөөгүй байна.

Хэлэлцүүлгийг эдийн засгийн сэтгүүлчдийн “Өөрчлөгч” клубээс зохион байгуулж байна.