Эх сурвалж : www.mse.mn Нийтлэгдсэн : 2016.08.17

Монголын хөрөнгийн биржийн 1-р ангилалд бүртгэлтэй “Мах импекс” ХК 2016 оны эхний хагас жилийн санхүү болон үйл ажиллагааны тайлангаа Монголын хөрөнгийн биржийн хурлын танхимд олон нийтэд нээлттэй тайлагналаа.

Тус компани 2015 оноос эхлэн техник технологийн шинэчлэлтийг эхлүүлж, 2016 онд хиам болон лаазалсан бүтээгдэхүүний үйлдвэрийн тоног төхөөрөмжийн бүрэн шинэчлэлтийг хийж чадсан. Мөн Европ стандартын савлагааны технологийг үйлдвэрлэлдээ нэвтрүүлсэн нь Монголдоо төдийгүй Ази тивдээ анхдагч болж байна. Одоо ISO 22000 чанарын удирдлагын тогтолцоог нэвтрүүлэхээр ажиллаж байгаа бөгөөд ингэснээр бүтээгдэхүүнээ экспортлох улсын тоо болон бүтээгдэхүүний хэмжээг нэмэгдүүлэх боломжтой болох юм.

“Мах импекс” ХК 2016 онд IFFA буюу Олон улсын махны салбарын хамгийн том үзэсгэлэнгээс Монгол Улсаас анх удаа өөрсдийн “Нүүдэл” болон “Дээжис” нэрийн бүтээгдэхүүнүүдээрээ алт, мөнгөн медаль хүртсэн нь тус компанийн бүтээгдэхүүнүүд олон улсад хүлээн зөвшөөрөгдсөний тод илрэл болж байна.