Эх сурвалж : www.gogo.mn Нийтлэгдсэн : 2016.03.10

Банкаа татаж унагаахаас нь өмнө барилгын салбарт хөрөнгө оруулсан нөхдөд дэм өгөх шаардлага тулгарлаа

Барилгын салбар адармаатай байна. Борлуулалт зогссоноор энэ салбарт оруулсан гурван их наяд орчим төгрөг барилгын “араг яс”, эсвэл арматур, цемент болж “гацав”. Ялангуяа орон сууцны барилгад хөрөнгө оруулсан хүмүүс яах учраа олохгүй, хий дэмий төрийн царайг харж сууна.

Төрийн бодлого л тэднийг барилгын салбар руу татсан. Тэднийг энэ салбараас хохиролгүйгээр гаргах үүргийг төр нуруундаа үүрэх нь нэг талаар шударга ёсонд нийцэх биз. Юу гэхээр төр л найман хувийн хүүтэй ипотекийн зээлийг санаачилж, барилгачдыг бариад бай, бариад бай гэж уриалсан.

Нөгөөдүүл нь Улаанбаатарын булан тохой, зай завсар дахь алга дарам газарт ч шавааралдуулаад л бариад байлаа. Чанар, стандарт, норм дүрэм замбараагаа алдав. Эцэст нь Улаанбаатар маань элдэв шалдав, эрээвэр хураавар барилгаас бүрдсэн “цоохор хот” болж хувирлаа. Зах зээлд 30 мянган орон сууц илүүдэв. Хэдэн арван оффисын барилгын “араг яс” хэрзийж, горзойж хоцорлоо.

Дансандаа таван төгрөгтэй хувь хүн, компани бүр барилгын салбар руу шүлэнгэтэн дайрсны гор ийн гарч байна. Зарим нь банкнаас их хэмжээний зээл аваад барилгын салбарт оруулчихсан. Тиймээс барилгын салбарынхны чанаргүй зээлийн хэмжээ тэлж, санхүүгийнхний санааг зовоож байна.

Банкаа татаж унагаахаас нь өмнө барилгын салбарт хөрөнгө оруулсан нөхдөд дэм өгөх шаардлага тулгарлаа. Барилгыг нь борлуулж байж л тэд энэ салбараас хохиролгүй гарах бөгөөд банкны зээлээ төлж чадна. Монголын барилгын үндэсний ассоциацын гүйцэтгэх захирал Б.Нэмэхбаатарын хэлснээр “Мөнгө түгжигдсэн нь эдийн засагтаа ч ихээхэн дарамт болж байгаа” гэнэ.

Тиймээс ч Барилга, хот байгуулалтын сайдын суудалд тухалсан хүмүүс компанийн борлуулалтын менежер шиг л ажилладаг болов. Өмнөх сайд Д.Цогтбаатар орон сууцны борлуулалтыг нэмэхээр ипотекийн зээлийн хугацааг 30 жил, урьдчилгаа төлбөрийг 10 хувь болгон бууруулах санаачилга гаргасан.

30 настай хүн л 30 жилээр орон сууц худалдаж авах боломжтой аж. Тэгэхээр 40 мянган өрх л уг хөтөлбөрт хамрагдах тооцоо гараад, түүний санаачилга “газар унажээ”.

Үргэлжлэлийг ЭНДЭЭС уншина уу.