Эх сурвалж : www.baganuurmine.mn Нийтлэгдсэн : 2014.11.04

2014 оны 10-р сарын 03-ны өдөр “Багануур” ХК Багануур дүүргийнхээ төв талбайд нээлттэй өдөрлөг зохион байгууллаа.

2014 оны 10-р сарын 03-ны өдөр “Багануур” ХК Багануур дүүргийнхээ төв талбайд нээлттэй өдөрлөг зохион байгууллаа. Тус өдөрлөг нь компанийн үйл ажиллагааг дүүргийнхээ иргэд оршин суугчид, хүүхэд залуучуудад сурталчлан таниулах уурхайн ололт амжилт, тулгамдсан асуудал, ирээдүйн талаар дүүргийн иргэдэд мэдээлэл өгөх зорилгыг агуулсан. Нээлттэй өдөрлөгт дүүргийн удирдлагууд болон байгууллагуудын дарга нар оролцлоо.

“Багануур” ХК Монгол улсын нийт нүүрсний хэрэглээний 60 хувь, эрчим хүчний нүүрсний хэрэглээний 70 хувийг дангаараа хангадаг үндэсний хэмжээний том компани. Манай  компани дүүргийн нийгэм эдийн засгийн хөгжлийг хөтлөгч, орон нутгийн суурь эдийн засгийн бүрдүүлэгч аж ахуйн нэгж. Багануур дүүргээс улс нийслэлийн төсөвт төвлөрүүлдэг албан татварын орлогын 45-46 хувийг “Багануур” ХК бүрдүүлж, дүүргийн аж үйлдвэрийн нийт бүтээгдэхүүний 78 хувийг дангаараа үйлдвэрлэдэг .

Нээлттэй өдөрлөгөө угтаж иргэдийн сэтгэлд нийцсэн олон ажил зохион байгууллаа.Тухайлбал:

• Дүүргийнхээ ЕБС-ын нийт сурагчдын дунд “Миний мэдэх Багануурын уурхай” сэдэвт зохион бичлэг, гар зургийн уралдааныг нас насны ангилалаар зохион байгуулж дүгнэсэн
• ЕБС-ын дунд ахлах ангийн 2300 сурагчдад “Алтан уурхай Багануур ХК”  сэдэвт 1 цагийн хичээл бэлтгэн мэргэжлийн багш нараар заалгасан нь хүүхдүүдийн сэтгэлд ихэд нийцлээ.
• Компанийн үйлдвэрчний эвлэлийн нэгдсэн хороо,  компанийн эмэгтэйчүүдийн зөвлөлөөс уриалан нийт уурхайчдаасаа хандив цуглуулж 4,6 сая төгрөгөөр Багануур дүүргийн Эрүүл мэндийн нэгдлийн төрөх тасагт шаардлагатай байсан ургийн монитор, пульс аксиометр гэсэн 2 тоног төхөөрөмжийг авч өгсөн
• Дүүргийн 5 хорооноос судалгаа авсны үндсэн дээр нийгмийн эмзэг бүлгийн 20 өрхөд тус бүр 1,2 тонн нүүрс үнэ төлбөргүй өгч буцалтгүй тусламж үзүүлсэн.
• 5 хорооны 300 гаруй иргэдтэй тус компанийн удирдлагууд хороон дээр нь очиж уулзалт зохион байгуулж уурхайн талаар мэдээлэл өгч, тэдний сонирхсон асуултанд хариулж,  иргэдийн санал хүсэлтийг авлаа.