Монгол Улсын Үндсэн хуулийн цэцийн гишүүнийг томилох, чөлөөлөх тухай асуудлыг үргэлжлүүлэн хэлэлцэж байна. УИХ дахь АН-ын бүлэг өчигдөр хэлэлцэж буй асуудлаар тав хоногийн завсарлага авах хүсэлт тавьсан бөгөөд нэг хоногоор завсарлагыг өгсөн юм. АН-ын бүлгийн дарга Д.Ганбат завсарлагын хугацаа богино байгаа тул 3 хоног сунгах хүсэлтийг дахин гаргалаа. Харин УИХ-ын дарга өнөөдрийн 12:00 цаг хүртэл завсарлага өглөө. 

Ингэснээр дараагийн асуудалд орлоо. Байнгын хорооны бүрэлдэхүүнд өөрчлөлт оруулах тухай хэлэлцэж байна. Тогтоолын төсөлд УИХ-ын гишүүн Ж.Эрдэнэбатыг Үйлдвэржилтийн байнгын хорооны гишүүнээр оруулахаар тусгажээ. Чуулганы нэгдсэн хуралдаанд 64 гишүүн оролцож, 64.1 хувийн саналаар тогтоолын төслийг баталлаа. 

Чуулганы нэгдсэн хуралдаанд УИХ-ын гишүүн Б.Пүрэвдорж бичгээр гаргасан хүсэлтийн дагуу үг хэлж байна. 

УИХ-ын гишүүн Б.Пүрэвдорж: Засгийн газар 5.1 их наяд хөтөлбөр хэрэгжүүлж эрүүл мэндийг хамгаалах, эдийн засгийг дэмжих, ажлын байрыг дэмжихэд зарцуулна гэсэн. Гэвч эдгээр үүргээ биелүүлсэнгүй. 5.1 их наядын тайлангаа тавихыг Ерөнхий сайд У.Хүрэлсүхээс хүссэн боловч  2.4 их наядыг нь тайлагнаад  2.7 их наядыг үлдээсэн. Үүний тайлбарыг өгөхийг Л.Оюун-Эрдэнэд өгсөн тайлагнах хугацаа нь болоогүй байна. Гэхдээ 2019 оноос 2020 онд үүссэн хадгаламжийн хэмжээ өссөн байгаа нь тайлагнаагүй 2.7 их наяд төгрөгийг албан тушаалтнууд хумсалсан байх магадлалтай байна. Тиймээс тайлангаа тавихыг Ерөнхий сайдаас нэхэж ажиллах болно. 10 их наядын задаргааг ч мөн УИХ-д тайлагнах ёстой. 

УИХ-ын дарга Г.Занданшатар: Халдварын тохиолдол тасралтгүй өсөж байгаа энэ нөхцөлд иргэн бүр, аж ахуйн нэгж бүр халдвар хамгааллын дэглэмийг баримтлах хэрэгтэй байна. Амны хаалтаа байнга зүүж, гараа тогтмол угааж, олноор цуглахаас татгалзмаар байна. Онцын шаардлагагүй бол орон нутаг руу зорихгүй байх хэрэгтэй. 

УИХ-ын чуулганы нэгдсэн хуралдаан эхэллээ.

Дээрх видеог үзэх боломжгүй бол ЭНД дарж үзнэ үү. 

Өнөөдрийн хуралдаанаар дараах асуудлуудыг хэлэлцэнэ. Үүнд:

1. Монгол Улсын Үндсэн хуулийн цэцийн гишүүнийг томилох, чөлөөлөх тухай асуудал (үргэлжлүүлэн хэлэлцэнэ);
2. Байнгын хорооны бүрэлдэхүүнд өөрчлөлт оруулах тухай;
3. Дэд хорооны бүрэлдэхүүнд өөрчлөлт оруулах тухай;
4. “Түр хороо байгуулах тухай” Улсын Их Хурлын тогтоолын төсөл /Улсын Их Хурлын гишүүн Ц.Даваасүрэн нарын 21 гишүүн өргөн мэдүүлсэн, анхны хэлэлцүүлэг/.