Эх сурвалж : www.gogo.mn Нийтлэгдсэн : 2019.10.03

ХААН Банк цамхагийн 14 давхраас Богдхан уул тийш сэлүүхэн харагдана. Гэхдээ уулнаас нааш улам нягтшин төвлөрч буй Улаанбаатарын өнгө төрх ярайна.

ХААН Банк цамхагийн 14 давхраас Богдхан уул тийш сэлүүхэн харагдана. Гэхдээ уулнаас нааш улам нягтшин төвлөрч буй Улаанбаатарын өнгө төрх ярайна. Хүн ам улам бүр нягтшиж буй энэ хотод банкны салбар ямар үйлчилгээг сонгон ажиллаж буйг ярилцахаар ирсэн нь энэ. ХААН Банкны Иргэдийн банк хариуцсан дэд захирал М.Энхсайханы өрөөний зүүн хананд хот дахь ХААН Банкны салбаруудын газрын зургийг томоор хэвлэн байршуулжээ. Үүнээс гадна орон нутгийн бүх салбарыг тэр хариуцан ажилладаг. Бидний яриа банкны салбарын өөрчлөлт, шинэчлэлтээс эхэлж, өдөр тутмын ажлынх нь тухай энгийн яриа болж үргэлжилсэн юм.

-Юун түрүүнд таны хариуцан ажиллаж байгаа салбарын талаар сонирхож байна. Иргэдийн банк гэсэн ухагдахууныг тайлбарлаж өгөхгүй юү?

-Банк харилцагчдаа гурав хувааж үздэг. Үүнд, томоохон байгууллагууд, иргэд, жижиг дунд байгууллагууд хамаарна. Үүнээс иргэд болон жижиг, дунд байгууллагуудыг нэгтгээд иргэдийн банк гэж нэрлэж байгаа юм. ХААН Банк ер нь иргэдийн банк цөмтэй. Том байгууллагуудад үйлчилгээ үзүүлдэг газрыг байгууллагын банк гэж тусдаа нэрлэдэг. Нэршил нь хэдийгээр Иргэдийн банк гэж буй ч бид жижиг, дунд байгууллагуудын үйчилгээндээ маш их анхаардаг.  

-Өмнө нь бид банк гэхээр зөвхөн зээл, эсвэл халамж, тэтгэвэртэй холбон ойлгодог байлаа. Гэтэл өнөөдөр банк өдөр тутмын амьдралын салшгүй хэсэг болчихлоо. Үүнийг дагаад банк ч мөн өөрчлөлтөд бэлэн байх шаардлага тулгарч байгаа байх? 

-Банк сонгодог утгаараа хуучин хэвээрээ байгаа. Гол үйлчилгээ нь харилцах данс, зээл, хадгаламж гээд цаашаа явна. Үндсэн үйлчилгээгээ хүргэх хэлбэрийг л өөрчлөөд байгаа юм. Өмнө нь банкинд биеэрээ очиж үйлчлүүлдэг байсан бол одоо цахим үйлчилгээ авдаг болсноороо гол ялгаатай. Мөн зөвлөх, харилцах хандлагууд илүү нэмэгдэж байна.

-Харилцагчдад банкийг сонгох зайлшгүй шаардлага бий. Гэтэл хотын хэмнэлд үүн шиг түвэгтэй ажил үгүй болох нь. Түгжрэл, цаг заваас эхлээд. Энэ асуудалд ямар шийдэл гаргаж байна вэ?

Улаанбаатарт манай харилцагчдын хоёр хувь нь л биетээр гүйлгээ хийдэг, үлдсэн 98 хувь нь зайнаас буюу онлайнаар хийж байна.

-Ер нь хүмүүс дуртай зүйлдээ цагаа зарцуулах хэрэгтэй. Цаг бол мөнгө гэдэг дээ. Түгжрээнээс шалтгаалж хотод цахим хэрэглээ өндөр байна уу гэвэл өрөөсгөл.  Орон нутагт ч интернэт банк, мобайл банкийг хүмүүс маш сайн ашиглаж байна.

Онлайнаар суманд 86 хувьтай, аймгийн төв дээр 96 хувьтай байна. Тэгэхээр хүмүүс түгжрэл гэлгүйгээр боломж нь байвал онлайнаар гүйлгээ хийх сонирхолтой байна аа гэсэн үг. Өнгөрсөн жил сумын төвийнхний 25 хувь нь биетээр үйлчлүүлдэг байсан бол энэ жил 14 хувь болж буурсан гэхээр маш хурдтай өөрчлөгдөж буйн илрэл. Бас интернэтийн хэрэглээ, үүрэн холбооны хүртээмж өргөжихийн хэрээр цахим үйлчилгээ хурдтай тэлж байна. Цахимжуулахаас гадна үйлчилгээний стандартаа сайжруулах, харилцагчийн үйлчилгээгээ чанаржуулахад бид анхаарч байгаа. Банкинд хүн орж ирэхэд хүссэн үйлчилгээг нь хүргэх биш, харилцагчид зөвлөгөө өгч, түүний хамтрагч байх нь гол юм.

Монголбанкнаас “Харилцагчийн санхүүгийн мэдлэгийг сайжруулъя” гэж уриалга гаргаад байгаа. Ялангуяа залуусын гаргадаг гол алдаа бол жаахан орлого орохоор л үнэтэй утас юм уу, машин авчихдаг. Түүнээсээ болж зээлийн дарамтанд орж, санхүүгийн хувьд өөрийгөө хүнд байдалд оруулдаг тал бий. Гэтэл өөрт орж ирэх мөнгөн урсгал, бусад хэрэгцээгээ тооцоод, өөр орлого олох уу гэх мэтээр санхүүгийн нөхцөлдөө тохируулж худалдан авалт хийх ёстой юм. Тиймээс энэ талын зөвлөгөөнд анхаарч байгаа.

Аль ч бизнесийн байгууллагад ашиг чухал. Харилцагч ашиг орлоготой байх тусам урт хугацаандаа аль аль талдаа илүү ашигтай ажиллана. “Хурдан явъя гэвэл ганцаараа яв, хол явъя гэвэл олуулаа яв” гэдэг үг байдаг даа. Миний ажигласнаар орон нутаг дахь зөвлөх үйлчилгээ илүү сайн байна. Яагаад гэвэл сум цөөн хүн амтай, бие биенээ таньдаг учраас маш сайн зөвлөгөө авч, өгч чаддаг. Гэтэл Улаанбаатарт тийм боломж байхгүй. Бараг намайг орсон ч манайхан танихгүй. Өөрөөр хэлбэл, харилцагчаа сайн мэдэхгүй байна. Тэгэхээр харилцагчаа таньж мэдсэнээрээ илүү олон боломжийг санал болгох давуу талтай.

-Хэдэн жилийн өмнөхийг бодвол банкны үйлчилгээ өөр болж байгаа нь анзаарагддаг. Үүдээр орж ирэхэд л “Сайн байна уу” гэж угтаад, зөвлөж чиглүүлдэг болсон байна лээ?

-Хөрөнгө оруулагч, харилцагч, ажилтан гэсэн гурван гол хүчин зүйл бий. Би ажилтан, харилцагч руу анхаардаг. Тиймээс өнгөрсөн жилээс ажилтнуудынхаа ажиллах орчин буюу харилцагчдадаа үйлчилгээ үзүүлэх орчныг шинэчилж, сайжрууллаа. Ажилтнууд тав тухтай оффист ажиллаад, ажил амьдралынх нь тэнцвэр хангагдаад эхлэхээр харилцагчдад илүү сайн үйлчилгээ үзүүлнэ, хандана.  Саяхны сургалтын дагуу ажилтнууд маань өнгөрсөн сараас “Танд юугаар туслах вэ?” гэж харилцагчдаасаа асуудаг болсон. Харилцагчид маань бидэнд илүү их итгэл хүлээлгэж буй учраас бид ч гэсэн илүү сайжрах хэрэгтэй.

-ХААН Банкны дараалал харьцангуй цөөрсөн нь банкны үйлчилгээ цахим болж байгаатай холбоотой байх. Шинээр ямар цахим бүтээгдэхүүн үйлчилгээ нэвтрүүлээд байна вэ?

-Сүүлд манай банкнаас Киоск машины үйлчилгээг нэвтрүүллээ. Одоохондоо арваадыг ашиглаж байгаа. Ирэх сардаа багтаан тоог нь нэмж, яваандаа Улаанбаатар, орон нутгийн бүх төв дээр байрлуулах зорилготой байна. Ингэснээр иргэд 24 цагийн аль ч үед очоод тодорхойлолт, дансны хуулгаа авах боломжтой болно. Өөр нэг ярьж буй зүйл нь байгууллага руу хандсан үйлчилгээгээ сайжруулъя гэсэн төлөвлөгөө. Жишээ нь, ямар нэг байгууллагатай холбоотой хэрэглээний төлбөрөө тушаах боллоо гэхэд заавал банкинд ирэх болдог. Гэтэл цаад байгууллагатай нь хамтраад   бүх төрлийн төлбөрийн мэдээлэл нь цахим банкин дээр нь ирдэг болгох боломж бий.  Үүн дээр илүү төвлөрч ажиллаж байна.

-Саяхнаас зарим тооцооны төвд бэлэн гүйлгээ, заримд нь бэлэн бус гүйлгээ хийхгүй гэсэн мэдэгдэл гаргасан байна лээ. Энэ ямар учиртай вэ?  

-Манайх хотод 72 салбартай. Эдгээрийн зарим дээр нь түрүүн хэлсэнчлэн бусад газруудтай хамтарч цахимжуулах үйлчилгээг, мөн бэлэн мөнгөний хэрэглээг багасгах үйлчилгээг туршиж байгаа юм. Бэлэн мөнгө нэг талаасаа хэрэглэхэд хүндрэлтэй, нөгөө талаасаа аюулгүй байдлын эрсдэл өндөртэй зүйл. Тиймээс бэлэн мөнгөөр дагнасан тусдаа төвүүдтэй, үйлчилгээ, зөвлөгөө  хүргэдэг тусдаа салбартай болъё гээд дөрвөн газар туршилт хийж байгаа юм. Жишээ нь, би банкинд ортол та миний өмнө үйлчлүүлж байлаа гэж бодъё. Та маш их бэлэн мөнгөтэй, тоолуулахад нэлээд хугацаа орно. Гэтэл цахимаар тэр мөнгийг шилжүүлээд авахад хамаагүй бага хугацаа зарцуулна. Банкинд ирэхгүйгээр шилжүүлэх ч боломжтой. Манайд цахимжилт өндөр байгаа учраас энэ туршилт амжилттай болно гэж итгэж байна.

-Танай банкинд нэг онцлог бий. Энэ нь магадгүй ажилтнуудынхаа ажил амьдралыг тэнцвэржүүлэхэд чиглэсэн санаачилга байх л даа. Амралтын өдрүүдэд амардаг, орой 17.00 цагт хаадаг гээд л?

-Улаанбаатарт амралтын өдрөөр ажилладаг ХААН Банкны гурван л салбар бий. Нарантуул болон Дэнжийн мянга захад бий. Ажлаа авсныхаа дараа ажиглахад тооцооны төвүүд 18.00 цагаас хаалгаа барьдаг ч ажилтнууд маань 20.00 цагт гэртээ харьдаг байсан. Яагаад гэвэл тарсны дараа ажлаа цэгцлэх, өдрийн хийснээ нягталсаар байтал оройтдог. Зарим тохиолдолд 20.00 цагт тарлаа гэхэд гэр нь хол бол замын түгжрэлд явсаар оройн 21.00 цагт гэртээ харина. Ажил амьдралынх нь баланс алдагдсан байсан. Хоёрт гэвэл нийт харилцагчдын хоёр хувь нь банкинд биеэрээ ирж үйлчлүүлж байгаа. Хэдийгээр банк хаалттай ч ATM, киоск, цахим үйлчилгээ нээлттэй байдаг. Тиймээс бид өнгөрсөн жилээс тооцооны төвүүдээ 17.00 цагт хаадаг болгож, ажилтнуудаа 18.00 цагт тарааж байя  гэж шийдсэн. Харилцагчид эхэндээ гомдолтой байсан ч одоо бусад сувгийг түгээмэл ашигладаг болжээ. Гол нь бид харилцагч нартаа банкны гол үйлчилгээнүүдийг 24 цагаар авч болох АТМ, цахим банк, аппликейшн, 1800-1917 лавлах утас, киоск зэрэг бусад сувгуудыг санал болгож байна. Иймээс ч харилцагчдын 98 хувь нь эдгээрийг Улаанбаатарт ашигладаг. Манай монголчууд шинэ технологи дэмждэг учраас удахгүй энэ үзүүлэлт 99.9 хувь болох байх.

Бас нэг зүйл нэмж хэлэхэд боломж байвал яваандаа ажлын нэг өдрөө 16.00 цагаас хаадаг болгоё, тэр өдөр ур чадвар, үйлчилгээгээ сайжруулахад цагаа зарцуулъя гэж ярилцаж байгаа.

-Саяхан танай ажилтнуудын хувцас шинэчлэгдсэн байна лээ. Яагаад заавал ногоон өнгийг сонгосон бэ? Илэрхийлж буй утга нь юу вэ?

-Манайх өмнө нь хүрэн хувцастай байсан. Гэтэл банкны лого ногоон байдаг. Салбар нэгжүүдийнхээ байранд их засвар хийж, тохижуулчихаад өнгөний зохицлоо хартал нийцэж өгөхгүй байсан л даа. Ингээд хувцсаа шинэчилье гээд логоноос арай жаахан цайвар ногоон өнгө сонгож, өөрчлөлт хийсэн. Одоо эрэгтэй ажилтнуудын хувцсыг шинэчлэх гэж байна. Хар саарал өнгийн костюм байх юм. Логонд бас хар өнгө бий. Хэрэглээ болон зохицол талаасаа харж лого өнгөнүүдээ бага зэрэг өөрчилж, хувцасны өнгөө сонгосон.

Банкинд үндсэн гурван төрлийн ажил байдаг. Борлуулалт үйлчилгээний ажилтан, харилцагчийн зөвлөх буюу харилцагчийг орж ирэхэд тосож үйлчилдэг ажилтнууд, мөн харилцааны менежер. Өмнө нь бүгд адилхан дүрэмт хувцас өмсдөг байлаа. Тэгвэл одоо харилцааны менежерүүд хүмүүстэй харилцаж, гадуур дотуур их явдаг учраас дүрэмт хувцас биш оффис костюм өмсдөг болсон. Харин харилцааны зөвлөхүүдэд биед нь эвтэйхэн, чөлөөтэй байх, мөн харилцагчтай энгийн харилцаа үүсгэх үүднээс поло цамцтай болгосон. Мөн өдөржин ихэнхдээ зогсдог учраас хөлд эвтэйхэн гутал өмсөх боломжийг олгосон. Энэ бол нэг талаасаа ажилтнуудын ажиллах хэв маягт тааруулах, нөгөө талаасаа банк хэрэндээ л шинэлэг байдлыг сонгож буй хэлбэр юм.

-Монголчуудын үйлчилгээний салбарт тулгамдаад буй харилцааны соёлын талаарх таны бодлыг сонсъё. Үүнийг яаж шийдэж, хэрхэн сайжруулах вэ?

-Бидний өөрсдийн орчны соёл өөрчлөгдөж байж л үйлчилгээний соёл бүрэн сайжрах байх гэж хувь хүний зүгээс боддог. Бага байхад ах, эгч, найзууд  маань хоорондоо бас л ширүүн харьцдаг байлаа шүү дээ. Гэтэл одоогийн хүүхдүүд тийм биш болсон. Ер нь нийгмийн соёл аяндаа бүх зүйлд нөлөөлдөг. Гэхдээ бид үүнийг хүлээгээд байхгүй өөрсдийн хувь нэмрийг оруулахаар хамт олноороо мэрийж байна.   

-Ажилтнуудын ажлын бүтээмжийг сайжруулах гол суурь нь юу вэ? Ихэнх газрууд цалин гэж боддог байх. Таны бодлоор?

-Мэдээж цалин зайлшгүй хэрэгтэй. Гэхдээ дан цалингаар шийдэгдэнэ гэж байхгүй. Ажилдаа сэтгэл ханамжтай, өөрөө үр дүнгээ мэдэрдэг байх ёстой. Би бол хүнийг баярлуулснаар сэтгэл ханамж авдаг. Надад хүн бэлэг өгөхөд мэдээж баярлана. Гэхдээ энэ нь өөрөө хүнд бэлэг өгөөд баярлаж буйг нь харахыг бол гүйцэхгүй шүү дээ. Тиймээс хүн ажлаасаа урамшдаг байх ёстой. Тухайлбал, анх бизнесийн жижиг зээл авахаар ирж байсан хүний бизнес амжилттай явбал түүнийг бахдан ярих, хамтдаа хөгжих сайхан байдаг.  Нэг талаасаа энэ нь бидний ажлын үр дүн.

-Монгол орны өнцөг булан бүрт салбартай 538 тооцооны төвийг нэгтгэж зангиддаг хүн нь та. Банкны ажилтнуудад болон үйлчилгээндээ ижил стандарт мөрдөнө гэж та ярьсан байсан. Энэ хэрэгжиж байгаа юу?

-Зорилгын хувьд 55 хувьтай л явна. Түрүүний хэлсэн хувцас, ажиллах орчин бол мөнгө нь байгаад боломж нь байвал хэн ч хийчихнэ. Гол нь ажилтнуудынхаа ур чадварыг сайжруулах. Шинэ ажлыг эхлэхдээ Улаанбаатарын тодорхой салбаруудаар зургаан сар туршаад, амжилттай тохиолдолд бүх салбартаа хэрэгжүүлдэг. Том банк учраас шинэчлэлийг маш болгоомжтой хийдэг. Гэхдээ хурд бас хэрэгтэй.

-Танай банк саяхан олон улсад нэр хүндтэй “Euromoney” сэтгүүлээс “Монгол Улсын шилдэг банк шагнал” хүртсэн. Олон улсын чиг хандлага ирээдүйд банк ямар болох бол?

-Олон улсад нэр хүндтэй энэ шагналыг манай банк 10 дахь удаагаа авч буй Монголын анхны банк болж байна. Энэ он манай банкны хувьд амжилт ололт ихтэй байна. Саяхан бас дэлхийн банк, санхүүгийн шилдгийг тодруулдаг “FinanceAsia”, “GlobalFinance” сэтгүүлээс 2019 оны “Монгол Улсын шилдэг банк”-аар шалгаруулсан. “Euromoney” сэтгүүлээс ирээдүйд банк ямар байх ёстойг тодорхойлсон байсан. “Банк нь цахим үйлчилгээгээр тэргүүлэгч төдийгүй түүндээ хөрөнгө оруулдаг, ингэснээрээ харилцагчдадаа банкны үйлчилгээг илүү чанартай үзүүлдэг, мөн нэвтрүүлж буй технологи, үйлчилгээ, нийгмийн хариуцлага, ажилтнуудынхаа амьдралд хувь нэмэр оруулж буй байдлаараа бусад өрсөлдөгч байгууллагадаа үлгэр жишээ үзүүлдэг байх” гэж тодорхойлсон байсан. Энэ нь манай  банкны зорилттой бүрэн нийцэж байгаа. Бид үүний төлөө л ажиллах болно.

-Банкны эрхэм зорилгод нийгмийн сайн сайханд хувь нэмэр оруулах гэсэн өгүүлбэр бий. Нийгмийн хариуцлагын хүрээнд ямар ямар ажил хийж байна вэ?

-Компанийн нийгмийн хариуцлагыг хэрэгжүүлж ажилладаг ХААН Банк Сан нэртэй тусдаа сан манайд бий. ХААН Банкинд орсноос хойш хоёр ч удаагийн арга хэмжээнд нь оролцож байсан. Анхандаа чиглэл, зорилгыг нь сайн мэддэггүй байлаа. Өнгөрсөн жил Увс аймагт хэрэгжүүлсэн “Хавдрын эсрэг үндэсний аян”-д оролцсон. Аяны хүрээнд орон нутгийн иргэдийг урьдчилан сэргийлэх үзлэг оношилгоонд үнэ төлбөргүй хамруулж, зөвлөгөө мэдээлэл хүргэдэг, шаардлагатай тохиолдолд тухайн аймагт нь яаралтай мэс ажилбар хийдэг. Орон нутгийн иргэд тэр бүр хотод ирж үзүүлэх боломжгүй, өөрийгөө ямар өвчтэйг ч мэдэхгүй хүн олон байсан. Аяны үр дүнд хорт хавдартай гэдгээ мэдээд эмчлүүлж эдгэсэн хүн олон хүн байгааг эмч нар хэлж байлаа. ХААН Банк Сангийн үйл ажиллагаанд ингэж биечлэн оролцсоныхоо дараа үнэхээр хэрэгтэй чухал аян хэрэгжүүлдэг юм байна гэж бодсон шүү. Ерөнхийдөө манай ХААН Банк Сан эрүүл мэнд, боловсрол, байгаль орчныг хамгаалах чиглэлд илүү анхаарч олон төсөл, хөтөлбөр хэрэгжүүлж байна. Мөн сүүлийн жилүүдэд компанийн нийгмийн хариуцлагаас гадна Тогтвортой хөгжлийн зорилгуудад банк хэрхэн хувь нэмрээ оруулж, дэмжиж болохыг бусдадаа үлгэрлэж, үйл ажиллагааныхаа бүх түвшинд нэвтрүүлэхэд анхаарч ажиллаж байна. 

-Өнгөрсөн жилийн таны ярилцлагад дурдсаныг санаж байна. Лавлах утасны үйлчилгээг тооцооны төвд биеэр ирж үйлчлүүлснээс ялгаагүй чанаржуулна гэж. Энэ зорилго хэр биелж байна вэ?

-Утсаар үйлчилгээ үзүүлэх амаргүй ажил учраас ажилтнуудынхаа ажиллах орчныг эхлээд сайжруулсан. Олон цагаар утсаар ярина, бас холбогдож байгаа гомдолтой харилцагч нар ихэвчлэн бухимдуу байдаг. Энэ нь ч аргагүй, бид өөрсдөө хангалтгүй үйлчилгээ үзүүлснээс болдог. Тиймээс ажилтнуудынхаа дунд үйлчилгээг сайжруулах болон сэтгэл санаагаа удирдах сургалт, хөгжүүлэлт хийсэн. Бас ажиллах орчныг сайжруулж, ажиллах хүчийг 30-40 хувиар нэмсэн. Ингээд өнгөрсөн жилийн 12-р сард энэ ажил жигдэрсэн.

Энэ жилээс илүү олон үйлчилгээг утсаар хүргэхийн тулд шинэ програм хангамж туршаад явж байна. ​

Оны эцсээр дуусчих байх. Дашрамд дурдахад, киоскоор үйлчилгээ авч байгаа хүмүүс төхөөрөмж дэх харилцуураар банкны ажилтантай видео дуудлага хийх боломж бий.

-Одоо банкны салбараас жаахан хазаймаар байна. Таны туулж ирсэн ажил, амьдралын замнал залууст сонирхолтой санагдах байх. Энэ хүртэлх М.Энхсайхан гэж хүний туулсан замыг та товчхон ярьж өгөхгүй юү?

-Би мэдээлэл технологийн инженер мэргэжилтэй. Мэргэжлээрээ гурав дөрвөн жил ажиллаад бизнес рүү орсон. Тэгээд менежер болоод сүүлийн 15 жил бизнес удирдлагаар мэргэшээд байна даа. Мэргэжил болон мэргэшил гэдэг хоёр тусдаа зүйл гэж боддог.

-Та тухайн үеийн Монголын хамгийн том компани “Эрэл”-ээс ажлын гараагаа эхэлж, “Мобиком”-ын удирдах албанд ажиллаж байсан хүн. Одоо ажиллаж буй салбарын чинь онцлог юу вэ? Энд ирээд хамгийн түрүүнд дасах шаардлагатай зүйл нь юу байв.

-Үзүүлэлтүүд, хэмжих хэмжүүр нь жаахан өөр учраас хэцүү байгаа. Тэрнээс харилцагч, бүтээгдэхүүн үйлчилгээ гэдэг үндсэн ойлголт бол хаана ч адилхан хүмүүсийн хоорондох харилцаа юм. Одоо хүртэл суралцаад л явж байна.

-Таны ажлын нэг өдөр хэрхэн өнгөрдөг вэ?

-Өглөө 05.45 –д босоод багахан дасгал хийгээд, хүүхдүүддээ цайг нь бэлдэж уулгачихаад 07.45 гэхэд ажилдаа ирчихдэг. Тэгээд и-мэйлээ шалгаж, өмнөх өдөр нь үлдээсэн ажлуудаа цэгцлээд 08.45 цагт бууж кофе аваад буцаад ирэхэд яг 09.00 цаг болдог юм. Тэгээд л ихэвчлэн оффистоо хүмүүстэй явж ярилцдаг даа. Ер нь надтай уулзах, утсаар ярихаас илүүтэй и-мэйл бичвэл хурдан холбогдох боломжтой. Орой бол 06.30 цагаас хэтрэхгүй ажлаасаа гардаг. Ихэвчлэн хүүхдүүд маань эсвэл харилцагчийн уулзалт хүлээж байдаг.

-Олон салбар нэгж хариуцаж ажилладаг хүний хувьд цаг хэмнэх, ажлаа амжуулах нууц “жор” тань юу вэ?

-Гол нь төлөвлөх. Төлөвлөхдөө нөхцөл байдлыг тооцох хэрэгтэй. Нөхцөл байдал өөрчлөгдвөл төлөвлөгөөгөө даруй өөрчлөөд эцсийн үр дүнг хэвээрээ байлгах нь чухал.

-Банкны салбарын хүн, дээр нь IT суурьтай. Ажлаа голдуу ямар апп дээр хөтлөн явуулдаг вэ?

-Outlook-ээс өөр аппликейшн бараг ашигладаггүй дээ. Сошиал орчин болон телевиз огт сонирхдоггүй.

-Шийдвэр гаргахын тулд судалгаанд суурилдаг байх. Гэхдээ хэрэглэгчдийн хүсэл, зорилгыг мэдэхийн тулд биеэр очиж ажиллах шаардлага хэр гардаг вэ? Хөдөө орон нутаг, хотын салбаруудад ч юм уу?

Надад бол өөрөө шийдэхээсээ илүү нэгт, ажилтнаа, хоёрт харилцагчаа сонсоод л боломжит хувилбарыг туршлагадаа тулгуурлан сонгож авах л ажил үлддэг.

-Ажлаа авсныхаа дараа аль болох хурдан бүх ажилтнуудтайгаа уулзъя гэж бодсон. Өнгөрсөн жилийн эхний хагаст бүх аймгаар явсан. Энэ жилээс шаардлагатай газруудаар хоёр дахиа очоод байна. 

-Үйлчлүүлэгч миний хувьд ирээдүйд ХААН Банкнаас юу хүлээх вэ?

-Банкны үйлчилгээ бол хүн бүхэнд санхүүгийн зөвлөгөөг сайн өгдөг, санхүүгээ удирдахад тусалдаг газар байх ёстой. Манай харилцагчид сайн байвал бид сайн байна гэж ойлгодог. Орчин нь муухай байхад хүн ганцаараа сайн, сайхан байгаад яах юм. Тиймээс бүгдээрээ хамтдаа сайн, сайхан амьдрахын төлөө  хичээн ажиллаж байна даа.

У.Бямбаням